Në kuadër të zgjedhjeve lokale 2015, Partnerët Shqipëri ka punuar në drejtim të rritjes së pjesëmarrjes aktive të publikut në proceset politike dhe vendim-marrjen vendore.

Partnerët Shqipëriasistoi koalicionet e palëve të interesit (përfaqësuesve të OJF-ve, biznesit, medias, të rinjve e studentëve, etj.) në Durrës, Vlorë, Pukë, Lezhë, Kavajë, Elbasan dhe Pogradec, për hartimin dhe zbatimin e fushatave advokuese për çështjet prioritare në komunitetet e tyre.

Në periudhën para-zgjedhore, koalicionet e qytetarëve punuan për të identifikuar dhe për të përfshirë çështjet prioritare në axhendat dhe programet e kandidatëve për kryetarë bashkie.

Që prej shtatorit, Partnerët Shqipëri po asiston koalicionet e qytetarëve për të kthyer premtimet zgjedhore në plane pune konkrete në bashkitë përkatëse, me qëllim krijimin e një modeli të qëndrueshëm të buxhetimit me pjesëmarrje si një mekanizëm për të rritur përfaqësimin dhe ndikimin e qytetarëve në vendimmarrjen vendore. Partnerët Shqipëri ka përpiluar një procedurë të brendshme për buxhetimin me pjesëmarrje në këto bashki, e cila tashmë është një dokument i miratuar në komunat e Vlorës, Pukës dhe Kavajës. Në ditët në vijim ajo pritet të bëhet e tillë edhe në bashkitë e tjera.

Iniciativa zbatohet nga Partnerët Shqipëri me mbështetjen e Qendrës Olof Palme International dhe Ambasadës së Shteteve të Bashkuara të Amerikës në Tiranë.